المساعد الشخصي الرقمي

مشاهدة النسخة كاملة : قصيدة شمر


البحار حائل
24-08-2002, 09:10
حنّا الطنايا لا طنينا .. طنينا
تشهد لنا حايل وأجا والرعيله

وتشهد بعد كل القبايل علينا
إنّ الطنايا اسم ذيك القبيله

اسم الطنايا تاج فوق الجبينا
تاج ينومس كل راس .. يشيله

تاريخنا وافي لصرحه بنينـا
بافعل ربعي كاسبين النفيله

للشمس مرقاب الطنايا رقينا
في قمته _ في قمته نرتقي له

مثل النجوم الساطعات اعتلينا
ومثل السحاب وكل عينٍ تخيله

يابنت حنّا لازعلنا .. نوينا
ماهي سوالف (ألف ليله وليله)

(شمر) ليا عدو علومه تبينا
أفعالنا بالطيب كلٍ دريلــه

كبار الصحون ونفتخر لاحكينـا
وساع الطعون وفعلنا مايبي له

لاجا نهار؟! بالملاقى رسينا
مثل الجبال الراسيات الثقيله

يابنت حنّا لامشينا كفينـا
والله وكيلك مامشينا بحيله

نزوم لكن لانوينا قوينا
للعز نجم يستخيل ونخيله

عاداتنا_عاداتنا لارتكينا
كل الحمول الكايده نرتكيله

نشوش لامنّه تعزوى .. حدينـا
لاثار عج الخيل كلٍ وخيــله

حنّا مقابيس الوغى لاانتهينا
نار تقابس عند قبس الفتيلة

اليا ركبنا ظهورهن واعتلينا
عيب على اللي مايناطح قبيلة

مثل المزون الناشيات ان مشينا
والاكما سيل تحدر مسيلة

حنا الطنايا لازعلناوزمينا
نزوم زومات البحور الطويلة

واللة نقط اروحنا ماانثنينا
يوم الشدايد والسيوف الصقيلة

نشرب قراح صافي لاضمينا
حتى يبل اكبودنا سلسبيلة

نموت في عز وشرف ماشكينا
لاماشكينا ولابتي ينشكي لة

عاداتنا يابنت لامن غزينا
بسيوفنا نشف القلوب الغليلة

بالدم خضبنا السيوف وكسينا
لجل العيون الناعسات الكحيلة

كم فارس من فوق خيلة رمينا
من هامنا تبكي علية الحليلة

حريبنا يبلش ولا له معينا
إليا وقع بين الصناديد ويله

إليا رفع خشمه لخشمه وطينا
ناطا على خشمه وراسه نزيله

قاسين لاشان اللقا مانلينا
والموت لا منّه دعانا نجيله

بيض النوايا لابتي له وفينا
حنّا الطنايا يالقلوب الهبيله

وخوينا لاصار داله رضينا
حنّا هل الخوه ويكفي دليله

والجار كنّه من حدا والدينا
لو كان يخطي نحتمل جور ميله

ودخيلنا لامن زبنا حمينا
وإليا عوى ذيب الفيافي نعويله

والضيف نذبحله وتشهد يدينا
يكفي كرم حاتم بذبح الأصيله

ويشهد لنا ذيب تعشى السمينا
عشوه ربعي بالسنين البخيله

حنا هل الناموس رحنا وجينا
وأهل الوفا والكيف دله وهيله

وأهل الكرم حنا وياما عطينا
ياماعطينا من العطايا الجزيله

مثل الجبال بطيبنا شامخينا
افعالنا .. يابنت ماينقويله

يابنت حنا لا طنينا طنينا
ماهي سوالف ألف ليله وليله
--------------------------------------
تحياتي للجميع

شهد
25-08-2002, 01:01
تسلم ايدك البحار حائل

تعيش يا بعد حيي دار حاتم الطائي


تحياتي

qilip SuNToP qilip
25-08-2002, 06:28
انا اموووووووت واعرف وشهي الطنايا :confused:بحاااااار دورت في كل القواميس

لدرجه ساله بكذا روم .. ما لقيت اجابه

تكفى علمني :confused:

abu_waleed_5
26-08-2002, 12:43
هلااااااااا والله اخوي بحار حاااااائل

وصح للسانك وللسان شاعرهاااااااااااااااااااااا


سن توب تبي تعرف معنى طنايا وين عايش انت ههههههههههههههههه


افاااااااا ما تعرف طنايا ههههههههه

<<<<<<<<<<<<<<< على باله يعرف ما يعرف اش معنى طنايا ههههههههههههههههههههههههههههه



لا انا اقولك سألت ابوي يقول

معنى الطنايا اهل الكرم والجود000


على ذمه ابوي خخخخخخخخخخخ

جورج البيك
26-08-2002, 05:03
هلا بك اخوووووي بحار حايل والله والنعم بك يا بناخي الطنايا يا بعدي هي القمة في الاقدام على الفعل سواء في الكرم او الشجاعة او النخوة ونحوها من الصفات وبحكم ان شمر قبيلة ذات صيت لامع مثلها مثل باقي القبائل العربية سموا انفسهم بالطنايا وهي نخوة لشمر مثل السناعيس وبعض القبائل ايضا تسمي نفسها الطنايا كالرشايدة يقولون حنا طنايا عبس وسلمت يالبناخي

البحار حائل
26-08-2002, 09:19
انا أسف على تأخر الرد وهذا خارج عن الأرادة والله من وراء القصد .....

الأخت شهد
والأخ ســــــــــــــــــــــــــــــن تووووووووووووب
والأخ ابو الوليد
والأخ وأبن العم ( جورج البيك)
لا شكر يأخت شهد
وأخوي سن توب ترى ولد عمي جورج ( أه لو لي ولد عم أسمة جورج )وفى وكفى وماقصر باجابته ولا يمكن ان أتعدى علية حيث قال كل مأرت قولة ويعطيكم العافية جميعاً ( أيه عزوتي وحيي وميتي أنتم )